Savores de siempre

Saturday, January 28, 2006

Dulse de Bimbriyo : La Resefta

Ya se ay una semana ke meti en el sitio la foto del dulse de bimbriyo, e yay una semana ke estas asperando esta resefta. La resefta de bimbriyo es una resefta ke se merese :)
Mi gramama aziya un dulse de bimbriyo delisioso. Kon mi ermana eramos muy chikas para demandarla las reseftas ke aziya , i kuando fuimos en edad de demandar las reseftas se murio. Esta resefta es de la gramama de mi mama ke era de Tiria. Kon este mesura es siguru ke vas a reushir.

Dulse de Bimbriyo :

-Mundar los bimbriyos i kortarlos en pisikos chikitikos
- Los eskaldar poko a poko
-Kuando estan blandos, kitaldos de la agua i los eskurir.
-Azer una pure kon los bimbriyos blandos

-Para una kupa de pure se mezura una kupa de asukar
-Meter a kozer, fina ke se espesa.
-Se mete en un paylon i se desha a sekar

Esto es la hadra :)))))

Sunday, January 22, 2006

Dulse de Bimbriyo


Keridos amigos, esta semana no tuve tiyempo para meter kozas muevas en el blog, ma tomi la foto del dulse de bimbriyo ke mi nona aziya e ke komiyamos kada anio en Izmir. Agora lo ago kon mi mama, porke mi papa metio un arvol de bimbriyo en la guerta :)

Vo kontinuar kon la resefta en pokos dias

Sunday, January 15, 2006

Fritada de Kalavasa


Keridos meldadores,

Kontuniando a dar mis sekretos, los reseftas son verdaderos sekretos de familia :), vos vo a kontar la resefta la mas fasil de la kultura sefaradi, la fritada (ke me parese ke se yama almodrote en Istanbul)
Ay muncha manera de azer la fritada, de kalavasa, de pirasa ke se yama prasifuchi, de espinaka… Ay una koza muy kurioza. Tenemos una amiga de Adana ke aze kozas muy paresidos a la kuzina sefaradi de los Izmirlis. Entre otras kozas ayi azen una kumida ke parese muncho a la fritada, ma se yama ‘mücver’ (en turko) i es chikitiko i se frien

Oy la resefta de la fritada de kalavasa

Ingredientes

-500 g kalavasa
-3 guevos
-la miga de 2 revanadas de pan seko (si no tenesh pan puedes meter 2 kucharas de arina)
-sal, pimienta i ‘pirsil’ (no se kualo es el biervo)
-Kezo rayido

Preparamiyento

-Se munda i se rayi las kalavasas
-Esprimir la agua de la kalavasas
-Las kalavasas esprimidas, se mesklan kon la miga del pan (un poko mojada i esprimida), los guevos, sal, pimienta
-Se mete en un pyrex kon un poko de alzete, se vazya la preparasyon de kalavasa. Enriva se mete kezo rayido e se mete al orno.

Afiyet Olsun :)

Wednesday, January 11, 2006

Dezazer o Derritir?

Mis reseftas son todas eskritas en turko o en fransez, solo el nombre de la resefta es en ladino. Para ke se entendya bien demandi a mi mama komo se dize este biervo o este vierbo en ladino, a kada biervo ke eskrivio lo demandi si ya se puede entender lo ke estava eskriviendo.

Kuando estava eskriviendo la resefta le vino al tino de mi mama ke se diziya dezazer para la manteka. Ma nunka oyi este biervo, lo meti en la resefta i despues me dichi, deke no mirar en un diksonario ??? Topi el diksyonario elektroniko i tomi el diksyonario de Joseph Nehama e empesi a bushkar…

Ke surpreza kuando meldimos kon mi mama ke la manteka se derriti e no se dezaze !

Me parese ke me va ambezar munchas kosaz …

Sarah

Monday, January 09, 2006

Roska




Para mi primera resefta kiji meter una kosa dulce i ke me plaze muncho : es la roska. Me parese ke la roska es una spesialita de Izmir. Yo tengo 2 reseftas de roskas, la una de la tia Sarah i la otra de la tia Julia de mi mama. Oy vos eskrivo la de la tia Julia. Tomi munchas reseftas de las tias de mi mama, e oy me alegri de aver tomarlas :)

En Izmir la roska se komiyava kon kezo blanko i se aziya noche de shabbat i se embiyava al banyo de la novia de parte de la esfuegra.

La Roska de tante Julia

Ingredientes

-42 g levadura
-media kupa de asukar
-60 g de manteka (dezazida)
- lo ke toma de arina
-una kupa de leche
-Kanela
- un guevo para la masa i un guevo para meter enriva



Preparamyento

-En primero meter en un plato ondo la levadura kon 2 kucharas de arina, una kuchara de asukar, un poko te sal i una kupa de agua tivia. Mesklar i dechar en un lugar kente medya ora.

-Kuando la levadura esta pronta mesklar la levadura kon la manteka, l’asukar, la kanela, el guevo i la leche tivia. Meter l’arina para azer una masa no muy dura.

-Meter en un lugar kente para ke la masa se alevanta.

-Kuando la masa se alevanto, lavorar la masa de muevo i dar la forma de un ‘simit’ grande.Dechar reposar de muevo (media ora)

-Despues de media ora pasar el guevo enriva i meter un poko de ‘susam’
-Meter al orno 25-30 minutas

Si ay personas ke tiene otras reseftas de roska puedes eskrivir las en la parte de komentaryo

Sunday, January 08, 2006

Para empesar: saludos de Fransia

Keridos amigos,

Esta maniana meldando los bloges turkos i fransez de mi ermana me dichi deke no avrir un blog en ladino para amostrar a todos ke muestra lingua esta biva. Para mi una lingua biva es una lingua ke se avla kada dia, gizando, kuando estamos iniervosos …
Komo mos agrada en la familya gizar, komer… es por esta razon ke avri un blog de kuzina ke se yama Savores de Siempre. Kero meter, entre otras kosaz, las reseftas sefaradis ke tengo de mi mama, tias …

Si ay personas ke keren aventurarse en este projeto son buenvenidas

Sarah

PS : siguru va a tener yerros in mis eskritas, de agora pardon.